رشتوں کی کمزوری

انسانی زندگی میں رشتے درختوں کی مانند ہوتے ہیں،جو زندگی کی کڑی دھوپ اور تھکا دینے والے سفرمیں ٹھنڈی چھاؤں فراہم کرتےہیں اور زندگی کو آسان و خوش گوار بناتے ہیں،اگر ان رشتوں کو محبت و توجہ کی روشنی اور اخلاص و احساس کی آب و ہوا ملتی رہے، تو یہ  پروان چڑھتے اور پھلتے پھولتے رہتے ہیں،مگر افسوس کہ آج کے تھری جی اور فور جی کے تیز رفتار دور میں رشتے ٹوٹ پھوٹ کا شکار ہیں کیوں کہ ان میں اخلاص و احساس نہیں ہے، رشتوں میں "اخلاص و احساس ہی ہوتا ہے،جو رشتوں کو قائم رکھتا ہے،

ہمارے دلوں میں کینہ و کدورت اس قدر رچ بس گیا ہے کہ اخلاص و احساس اور محبت کے جذبات کی گنجائش ہی نہیں رہی،ہم نہیں سمجھتے کہ محبتیں بانٹنا ہماری اپنی ذات کے لیے ہی مفید ہے جب کہ دل میں بغض،کینہ و نفرت پالنے سے صرف ہماری ذات کا ہی نقصان ہوتا ہے،دلوں میں رنجشیں لیے ہم اتنے مادّہ پرست ہو چکے ہیں کہ رشتوں کی تعظیم و توقیر اور قدر کھو چکے ہیں،رشتوں کی اہمیت و افادیت ہمیں صلہ رحمی کا حکم دیا گیا ہے،مگر ہم صرف اپنی انا کو فوقیت دیتے ہیں،مروّت و مفاہمت،صلح و آتشی کے الفاظ ہماری زندگی سے ختم ہوگئے ہیں،اسی سبب معمولی رنجش کت باعث رشتے بہ آسانی ٹوٹ جاتے ہیں

اور جو بہ ظاہر قائم ہیں، ان کا حال یہ ہے کہ اپنے تو ہیں، مگر ان میں "اپنا پن" نہیں ہے،عزت و احترام اور احساس سے عاری ان رشتوں کو ہم زبردستی نبھائے جا رہے ہیں،ہمارے رشتوں کا استحکام اور بقا ہمارے اختیار میں ہی ہے، ضرورت اس امر کی ہے کہ عصرِ حاضر کی بھاگتی دوڑتی زندگی سے رشتوں کے لیے وقت نکالا جائے،کھوئے ہوئے اخلاص و احساس واپس لایا جائے اور رشتوں کے حقوق ادا کیے جائیں،رشتوں کی عزت و احترام، تعظیم و توقیر کی خوب صورت اقدار و روایات کو زندہ کیا جائے۔

بے مقصد عید

پروردگارِ عالم نے ماہِ رمضان کی عبادتوں و ریاضتوں کے اجر کے طور پہ عید کی صورت تحفہ عطا کیا، اس عید کا فلسفہ اور حقیقی روح یہ ہے کہ باہمی اعانت و امداد کے سبب، معاشرے میں معاشی و معاشرتی ناہمواریاں نہ ہوں، باہم میل ملاپ سے صلۂ رحمی ہو، اخوت و بھائی چارہ پروان چڑھے، اتحاد و اتفاق تقویت پائے،

مگر ہم اپنی عید کا جائزہ لیں، تو ہمیں ہر طرف دکھاوا، ریا کاری اور خریداری میں ایک دوسرے پر سبقت لےجانے کے مناظر دکھائی دیتے ہیں،چاند رات جو عبادتوں کے اجر کی رات ہے، وہ ہم خریداری میں ضائع کردیتے ہیں،دلوں میں محبت کے جذبات کے بجائے حسد و کینہ لیے، ہر طرف افراتفری کا عالم ہوتا ہے، بدلتے زمانے کے ساتھ ساتھ، ہمارے عید منانے کا انداز بھی بدل گیا، اسی سبب آج ہمارے تہوار پھیکے اور بے رنگ و بے مقصد ہیں، معاشی ترقی کی دوڑ میں بھاگتے، اپنی اعلا اقدار و تہزیب گنواتے، عیدین کے حقیقی مقاصد کو پسِ پشت ڈالتے، دنیاوی نقصان پہ ہمہ وقت افسوس کرتے، ہمیں اپنےاس نقصان کے بارے میں سوچنا ہوگا!

من کی دولت

مقابلے و مسابقت کے اس تیز رفتار مشینی دور میں، روپے پیسے کے پیچھے بھاگتے، جمع و تفریق، حساب کتاب میں گھلتے، جمع و تفریق میں الجھے، کیا ہم  کبھی "من کی دولت" کا شمار کرتے ہیں؟؟؟  خلوص و محبت،قناعت، سچائی و سادگی، سخاوت و بے نیازی، درد مندی و رواداری، باہمی خیر خواہی و اعانت، یہ وہ اصل دولت ہے، جو ہمیشہ ہمارے ساتھ رہتی ہے،اور جو کبھی گھٹتی نہیں، بل کہ ہمیشہ بڑھتی ہی رہتی ہے اور ہماری دلی آسودگی، خوشی اور سکون و اطمینانِ قلب کی بھی موجب ہے۔

اس ضمن میں، نبیؐ اقدس کا فرمان ہے: "امیری یہ نہیں کہ سامان ذیادہ ہو، بل کہ امیری یہ ہے کہ دل غنی ہو" (حوالہ: صحیح مسلم)، ایک اور حدیثِ مبارکہ ہے کہ: " دولت مندی مال و اسباب سے حاصل نہیں ہوتی، بل کہ اصل دولت مندی بے نیازی ہے" بہ حوالہ: صحیح مسلم)۔

 مگر، افسوس کہ آج ہر شخص روپے پیسے کے حصول کے لیے،ترقی کی دوڑ میں شامل اس قدر مصروف ہے کہ اتنا بھی وقت نہیں کہ خود اپنا حال احوال معلوم کر سکے، اپنے دل کی حالت و غربت پہ غور کر سکے،بس، دوسروں کی زندگی سے اپنی زندگی کا تقابل و موازنہ کرتے، دوسروں کو پیچھے چھوڑ کر،آگے بڑھ جانے کی تمنا میں، کبھی نہ ختم ہونے والی دوڑ میں دوڑے جارہے ہیں، دوڑے جا رہے ہیں، یہی وجہ پے کہ آج زندگی میں سب کچھ ہونے کے باوجود بھی بے سکونی و بے چینی ہے۔

کیا ہی عجب معاملہ ہے کہ تن کی اس دولت کے لیے جو آنی جانی شے ہے، اس کے حصول کے لیے ہم اپنی زندگی وقف کیے ہوئے ہیں، اور من کی اس دولت کے لیے جو پایئدار ہے، اس کے حصول لے لیے ہمارے پاس سوچنے کی بھی فرصت نہیں!

بہ قول علامہ اقبال:

                       "من کی دولت  ہاتھ  آتی  ہے، تو  پھر  جاتی  نہیں

                       تن کی دولت چھاؤں ہے،آتا ہے دھن،جاتا ہے دھن!

تن کی دولت کے لیے سرگرداں، روپے پیسے کے اعداد و شمار میں مصروف، اگر ہم اپنی "من کی دولت" کا جائزہ لیں، تو ہم پہ منکشف ہو کہ ہم درحقیقت کتنے غریب اور کس قدر مفلس ہیں!ا

محبت کی ترجماں، ماں

شہد سی شیریں، کرن سی اجلی، گھنیری چھاؤں سی ٹھنڈی، بادِ نسیم سی نرم، شبنم سی پاکیزہ، ساگر سی گہری، پھولوں سی مہکتی، تتلی سی حسّاس و لطیف، بہار سی خوش گوار, ماں کی محبت بیاں کرنے کے لیے، کیا کیا تشبیہات و استعارات استعمال نہ کیے گئے، تمثیلات بیاں نہ کی گئیں، مگر، حقیقت تو یہ ہے کہ اس  مجسمِ محبت، پیکرِ ایثار و اخلاص، سراپا الفت و چاہت ہستی ماں کی محبت، درست طور بیاں کرنا مشکل ہے، غم کی دھوپ میں سائیبان سی، درد کی حبس ذدہ فضا میں ساون سی، دکھ کے گرم موسم میں شام سی، اداسی کی خزاں رت میں بہار سی، ماں کی محبت کتنے رنگ، کتنے روپ لیے ہے، بیاں مشکل ہے۔

غموں کی دھوپ کتنی ہی کڑی کیوں نہ ہو، ماں کے شفقت کے ٹھنڈے گھنے سائے تلے، ہر غم رفع، ہر دکھ دور ہوجاتا ہے،

                           ماں کی ممتا، چاند کی ٹھنڈک، شیتل شیتل نور

                          اس کی چھایا میں تو جلتی دھوپ بھی ہو کافور

اولاد کے بہنے والے غم کے آنسوؤں کے موتی چُن چُن، سُکھ کی کلیاں لڑیوں میں پروتی، اپنے مشفّق ہاتھوں کے مخملیں و پُر اثر لمس سے،  ماں صفحۂ ہستی سے ہر غم مٹا دیتی ہے،

                         موجزن ہوتا ہے ہر ذرّے میں دریائے نشاط

                        صفحۂ  ہستی  سے  ہر غم مٹا دیتی  ہے  تو

                         وادیوں  میں  دل  کے  گرتے   ہیں  آب شار

                         گلشنِ  احساس  میں  کلیاں کھلا  دیتی ہے تو

اور:

                       مجھے  بس اس   لیے بہار اچھی  لگتی   ہے

                      کہ یہ بھی ماں کی طرح خوش گوار لگتی ہے

ماں محض اک رشتہ نہیں، رتبہ ہے، پروردگار نے جنت ماں کے قدموں تلے رکھ دی ہے۔

                      خدا نے کیا عجب رشتہ  دیا  ہے

                     کہ ان تلوؤں کو بھی رتبہ دیا ہے

                      بتاؤ  کیوں  دمکتا  ہے  یہ  چہرہ

                      مِری ماں نے اسے بوسہ  دیا  ہے

اور اس پیکرِ ایثار و اخلاص ماں کی محبت سے ہی اللہ پاک نے، اپنی مخلوق سے محبت کی تشبیہ دی ہے۔

                        پروردگار  ماں  کی  محبت  کی  ہے  دلیل

                         اور ماں ہے خود ایثار و خلوص کی  فصیل

                        سینے پہ کائینات کے،احساس کی ہے جھیل

                        عادل خدا کی زات، تو یہ ماں بھی ہے عدیل

یہی نہیں، ماں کے چہرے کو پیار سے دیکھنے کا ثواب، مقبول حج کے برابر رکھ دیا

            ماں کاچہرہ اتنا بابرکت ہے،تسبیح کےدانوں کی طرح

            میں  پیار سے  دیکھتا  گیا،  اور عبادت   ہوتی   گئی

اور اسی ماں کی پریشانی کو دیکھ کر ہی اللہ پاک نے سعئ صفا و مروہ کو حج کا رکن بنا دیا۔

                     الفت  ہے ماں کی، الفتِ  خالق  کی  جستجو

                     اس  کا مزاج  ہے صرف  محبت  کی گفتگو

                     انسانیت   کی   نسل   کی   ماں   قوتِ  نمو

                      اولاد صرف ماں کی دعا سے  ہے سرخرو

محبت سے سرشار، چاہت سے لب ریز، ماں کا وجود،اولاد کی تکالیف کا دافع ہے، تو ماں کی دعائیں اولاد کی جیت، کام یابیوں اور کامرانیوں کا سبب ہیں، کہ:

                           کہاں بساطِ جہاں اور میں کم سن و ناداں

                            یہ میری جیت کا سب اہتمام  تم سے ہے

خود کتنی ہی کڑی دھوپ میں کیوں نہ جلتی ہو، کیسی ہی کٹھنائیوں سے نہ گزرتی ہو، مگر اولاد کے لیے صرف دعاؤں کے موتیاں برساتی، پیار کا ساگر بہاتی ہے۔
                    اس  ظلم  کی  دنیا  میں فقط  پیار مِری   ماں
                     ہے   میرے  لیے  سایۂ  دیوار   مِری   ماں                       

                     نفرت کے جزیروں سے،محبت کی حدوں تک

                   بس پیار ہے،ہاں پیار ہے،بس پیار مِری  ماں!

ماں جیسی ان مول نعمت کی اہمیت کا صحیح اندازہ، ماں کی اصل قدر ماں کے جانے کے بعد ہوتی ہے، کیا ہی خوب ہو کہ اس ان مول رشتے کی قدر اس کی موجودگی میں ہی کریں، اظہارِ محبت کے میٹھے بول، پُر خلوص دعاؤں کا تحفہ دنیا میں ہی وقتاً فوقتاً پیش کیا کریں کہ بے شک کہتی نہیں، مگر ماں اپنی متاعِ حیات اولاد کے اظہارِ محبت کی چاہ رکھتی ہے۔

کل ماؤں کے عالمی دن پر تمام عظیم ماؤں کے لیے خراجِ تحسین اور خصوصاً اپنی صابر ماں کے لیے اس اظہارِ محبت اور پُر خلوص دعا کا تحفہ:

میری پیاری صابر امّی!

زندگی کی پہلی سانس سے لے کر اب تک، میرے ناز نخرے، لاڈ پیار اٹھانے، میری کوتاہیاں، لاپرواہیاں، نافرمانیاں، میری ہر خطا وغلطی در گزر کرنے، ناراضی میں بھی میرے لیے ہر لمحہ فکر مند ہونے کے لیے بہت شکریہ، آپ جیسی خالص و بے لوث محبت، لاڈ پیار، دلار،اس دنیا میں اور کوئی ہستی نہیں کر سکتی، داستاں میرے لاڈ پیار کی، بس ایک ہستی کے گرد گھومتی ہے، مجھےجنت سے اس لیے بھی پیار ہے، کہ یہ میری ماں کے قدم چومتی ہے۔
 امّی، میں آپ کی شفقتوں، محبتوں اور احسانوں کے انبار تلے دبی،آپ کے ایک احساں کا بدلہ بھی کسی طور نہیں چکا سکتی، بس یہ دعا:

                                             میری پیاری ماں سدا مسکرائے

                                            مقدر تجھے کوئی غم نہ  دکھائے

                                             تیرا  سایا  رہے   میرے   اوپر

                                             ہمیشہ تو  مجھ  کو  گلے  لگائے

                                            تیری زندگی ہو بہاروں کا مسکن

                                             خزاں رت سے تجھ کو اللہ بچائے

                                             ہماری خوشیاں توجی بھر  دیکھے

                                           تری پیاری صورت  سدا مسکرائے

                                             میرے  دل  کی  ہے  تمنّا  بس اتنی

                                             میری  زندگی تجھے   لگ   جائے

                                                                                  آمین!

ماسک

اسٹیج اداکار ماسک کا استعمال مصنوعی چہرے کے حصول کے لیے کرتے ہیں تاکہ کردار میں حقیقت کا رنگ بھر سکیں، مگر ہم حقیقی زندگی میں، ماسک کا استعمال دوسروں کو دھوکہ دینے کے لیے کرتے ہیں، یعنی ہر شے کی طرح، ماسک کا بھی غلط استعمال!

 یوں لگتا ہے کہ ہر شے کا غلط استعمال ہماری سرشت کا حصّہ بن چکا ہے، ذاتی مفادات کے لیے، چہروں پہ ماسک چڑھائے، ہم آپس میں ہی دھوکے دیتے ہیں، مصنوعی جذبات، مصنوعی گرم جوشی، مصنوعی محبت و الفت، مصنوعی گفتگو، حتیٰ کہ مصنوعی مسکراہٹ لیے، ہم باطن میں کچھ اور ظاہر سے کچھ اور

ہیں! بہ قول شاعر: 

                         دو چار نہیں،  مجھ  کو فقط   ایک  دکھا   دو

                         وہ شخص،جو اندرسےبھی باہرکی طرح ہو!

یہ جو آج ہم زندگی میں خلوص اور سکون کے نہ ہونے کی شکایت کرتے ہیں، تو اس کی وجہ ہمارے یہی مصنوعی جذبات ہیں، ہم دوسروں کا بھلا اور نفع نہیں سوچتے، دوسروں کے سکھ اور خوشیوں سے خوش نہیں ہوتے، بہ قول مصنف: "دورِ حاضر میں، لوگ اپنے دکھ سے نہیں، بل کہ دوسروں کے سکھ سے دکھی ہیں"۔

بھلائی اور سکون تو دوسروں کے لیے مفید ہونے میں مضمر ہے، تو پھر ہم کیوں شکوہ کناں ہیں؟

 آج معاشرے میں جذبۂ باہمی امداد کے مفقود ہونے اور رشتۂ مواخات کے معدوم ہونے کی بھی، ایک وجہ ہمارے یہ "ماسک چڑھے مصنوعی چہرہے" ہی ہیں، ان کے سبب معاشرے میں باہمی اعتماد و اعتبار بھی ختم ہوچکا! 

ہم چہرے پہ ماسک چڑھا کر دھوکہ کیوں دیتے ہیں؟ ذاتی مفادات کے حصول کے لیے!!!!!! دوسروں کی امیدوں اور توقعات کی تکمیل پورا نہ کر سکنے کے سبب!!!!!!!!!!!! اگر ہم دوسروں کی توقعات پوری نہیں کر سکتے، تو بہ طریقِ احسن انکار بھی تو کر سکتے ہیں کہ سچائی بھرا انکار، اس محبت بھرے مصنوعی چہرے اور اقرار سے بہتر ہے، جو دوسروں کو امید و آس اور دھوکے میں رکھے!

حقیقت تو یہ ہے کہ چہرے پہ ماسک چڑھائے، مصنوعی چہرہ لیے، ہم دوسروں کو نہیں، بل کہ خود اپنے آپ کو دھوکہ دے رہے ہوتے ہیں کیوں کہ دھوکے کو اپنے اصل ٹھکانے سے بہت محبت ہوتی ہے، یہ واپس ہمارے پاس آجاتا ہے!

طبقاتی تقسیم

                                                                 

1۔ اعلا طبقہ

2۔ متوسّط/درمیانہ طبقہ

3۔ نچلا/ زیریں طبقہ

معاشی لحاظ سے، ہمارا معاشرہ ان طبقات میں منقسم ہے، اعلا طبقے کو معاشرے میں نمایاں مقام حاصل ہے اور یہ طبقہ عزت کی نگاہ سے دیکھا جاتا ہے، متوسّط طبقہ بھی باعزت طبقہ کہلاتا ہے، جب کہ نچلے طبقے کو غربت کے سبب عزت کی نگاہ سے نہیں دیکھا جاتا، حال آں کہ یہ طبقہ بھی معاشرے میں فعال کردار ادا کرتا ہے، بل کہ اگر یہ طبقہ معاشرے میں اپنا کردار ادا نہ کرے، تو اعلا اور متوسّط طبقات کی بنیادی ضروریات کی تکمیل نہ ہو۔

محنت مزدوری کرتے ہوں، سامان لادتے لے جاتے ہوں یا کھیتوں میں اناج کی فصلیں اگانے پر مامور، اس طبقے کے افراد، معاشرے کے دوسرے طبقات کی بنیادی ضروریات کی تکمیل کی آسانی میں فعال کردار ادا کر رہے ہیں۔

کیا مشینی دور میں ہم کبھی غور کرتے ہیں کہ سا طبقے کا "نچلا طبقہ" کہلانے کی وجہ کیا ہے؟

صرف یہ کہ یہ طبقہ معاشی لحاظ سے کم زور ہے!!!! دوسروں کی ضروریات کی تکمیل میں مصروف، اتنے وسائل نہیں رکھتا کہ خود اپنی بنیادی ضروریات پوری کر سکے!!!!!! ہم نے دولت کو کسوٹی بنا کر، معاشرے کو طبقات میں تقسیم کر رکھا ہے!!!!!!!

دراصل یہ تقسیم ہم انسانوں کی محدود سوچ اور کم ظرفی کی غمّاز ہے، قدرت کا تو قانونِ مساوات یہ ہے کہ اس نے اپنی تمام نعمتیں، تمام انسانوں کے لیے عطا کی ہیں، ایسا نہیں ہے کہ اللہ پاک نے اپنی نعمتوں میں تخصیص کی ہو کہ فلاں حسین ترین علاقہ امراء کے لیے مخصوص ہے، اللہ پاک نے تو بلا تخصیص و امتیاز اپنی تمام نعمتیں تمام انسانوں کے لیے عطا کی ہیں، بل کہ ان کے لیے بھی جو اس کی ذات کے منکر ہیں! قدرت کا تو قانونِ مساوات یہ ہے کہ فرش پہ سونے والے اور مخملیں بستر پہ سونے والے، ایک جیسے خواب دیکھتے ہیں! تو پھر ہم نے کیوں معاشرے کو ان طبقات میں تقسیم کر رکھا ہے؟

معاشرے کے معاشی طور پہ کم زور افراد کو "نچلا طبقہ" جیسا سطحی نام کیوں دے رکھا ہے؟ کیا اس طرح ہم قدرت کے قانونِ مساوات سے انحراف نہیں کر رہے ہیں؟ ہونا تو یہ چاہیے کہ اس طبقے کو "حوصلہ مند طبقہ" سے موسوم کرنا چاہیے کہ عصرِ حاضر میں، وسائل نہ ہونے کے باوجود جینا حوصلے کا کام ہے!

اگر معاشرے کا ہر صاحبِ استطاعت اس "حوصلہ مند طبقے" کے ایک فرد کا ہاتھ تھام لے، تو معاشرے کے اس طبقاتی تقسیم کا خاتمہ ممکن ہے! حکومتی سطح پر بھی اس محنتی طبقے کے حقوق مقرّر کیے جانے چاہئیں، اور اس طبقے کو بھی اعلا و متوسّط طبقات جیسا مقام ملنا چاہیے!